هات الزهاب وهات كل المعاميل

من بعْد ذكر الله وحمْده وتهليل
والفرض في وقته وطاب المجالي
هات الزهاب وهات كل المعاميل
يا الصاحب اللي صحبته ما تزالي
شب الحطب في حضرة اللي حلاحيل
ناراً سناها ل عتمة الليل جالي
نبغى نسوي (كيف) يا طيّب الحيل
مشروب طعمه لذته شيّ عالي
من حب بنن ديرته مرها النيل
يروي عروقه سلسبيل زلالي
ب اول قطافه ما هو بعيد ومحيل
ناضج حبوبه مستوي ب عتدالي
اليا حمسته ريحته تعدل الميل
ان كان راسك بالهواجيس مالي
في وسط نجره اطحنه وارقب سهيل
وابدع من الابيات شعرا جزالي
في دلته فوحّه من ميّة السيل
في ربع ساعه وانتبه له ب حالي
من بعدها زلّه برفق وتسهيل
من فوق هيل ٍفاخر الصنف غالي
خله على جال الجمر واحذر يطيل
يكفيه غوشه واحده منْه صالي
من دلة صفرا بوسط الفناجيل
صبّه وسوقه للنشاما الرجالي
مقرن بن متعب الهرف