( حزن نبلك )

من جديد الشاعر البحر محمد صلاح الحربي قصيدته ( حزن نُبلك ) التي خص بها قراء (ملامح صبح ) ومع شكرنا لابي صلاح على حرصه وثقته، ندعوكم لتشاركونا قراءته حيث يقول:
يا الممطر اللي ما شفع منك وبلك
في ساحة المقفر وابو درب سالك
هذي هي احلامك، متاهاتك، ابلك
هي نفسها ترعى بدار المهالك
تدري بمن هو راح للحلم قبلك
فيه انتهى به علم من ليل حالك
كم انقطع بك للرجاء حيل حبلك
أو كم بقى موت الأماني بدالك
راهنت بالمشرق وجهزّت سُبلك
لكن مجال الشرق ماهو مجالك
لعل يلحق صادق النور شِبلك
ما ينتهي به درب حلم انتهى لك
ان ما صفى لو واحد لحزن نبلك
خيبات جيلك ما صفت لك لحالك
قل إنه العصر الردي، وانكتب لك
والله يخلّي لك معالي خيالك