قصيدة للشاعر ناصر بن علي بن شتوي

طردٍ ورى المقفين نقصٍ في العقول
الناس قالوها وانا بقولها
•••
مادامني عاقل ولاني بمهبول
بخاطب العالم بقدّ عقولها
•••
أكيد كلن له مزاج وله ميول
ميول بعض الناس محدن حولها
•••
مثل السنة وشهورها عدة فصول
صحيح معروفه بعَدْ افصولها
•••
لاكنها ماتشتبه مهما نقول
فصل الشتاء والصيف أشد احلولها
•••
هاضتني علومن كما دق الطبول
في حفلةٍ ياويش كثر اطبولها
•••
سمعتها واحترت ويجيني ذهول
وكرهت قايلها بعد منقولها
•••
اجبال زالت والطبايع ماتزول
مالمستحيل اتحاول انك اتزولها
•••
واللي يضيق خاطري كثر الفضول
واللي تبختر في المسير بزولها
•••
في ظنها ان المال غطى عالفعول
والناس شاهدها صنيع افعولها
•••
ياللي تحسب المال لا تنسى الأصول
المال ماينسي الرجال أُصولها
•••
الوقت هذا غير وعلومه تهول
والناس غير وغيَّرت مدلولها
•••
احترت وآدور مثل غيري حلول
الله يصيب اهل الردا ويهولها
•••
مرض رداهم كل شهر وكل حول
واهل النفاق اليا بدو فزولها
•••
هذولي الصنفين انا عنها عدول
مالي بديرتها ولا ابغى اجولها
•••
الصدق لاهل الصدق بوابة دخول
والكذب يمنع قربها واْدخولها
•••
وباب المجامل والحسد دونه قفول
والغياكرهها مع مرسولها
•••
وانا مع اصحاب الصراحة والعقول
واهل الفعول اللي تثبّت قولها
•••
الشاعر: ناصر بن علي بن شتوي