قصيدة حصرية للشاعر مشعل الشويش

يالله ياقاسم الارزاق يالوالي = تعين نفسي على نفسي وتحماها
من زمرة الحاسدين ولاهب الصالي=ومن شرها والهموم اللي تولاهآ
مابين قرب الطموح/وبعد الامالي= اسوق عيس الظنون وتقصر خطاها
ومابين بعد القريب/وقسوة الغالي=وصدوف" الوقت يكتبها وانا اقراها!
اسوق هقواتي بغبآت الاهوالي=ويضيع عنوانها مادل مرسآها
تخيب بعض الوجيه ولا انشغل بالي=ومقافي الناس مانيب آتقفاها
بعض المشآعر عجاج" فالخلا الخالي= يهب عاصوفها والهجر يذراها
وبعض المشآعر سوات الغيث همالي=وشرهات فكري على ابياتي ومعناها!
اسوق من دلة الاحساس فنجالي=واغلا المخاليق بالوصل يتقهواها
مالي ومال البشر لا شفته قبالي= ابيع كل الخلايق وآتناساها !
وان غاب عني يبين النقص في حالي=وسآعات وصله على نار آتحراها .
لولآه م اتعبت هاجوسي بالأمثالي=ولآبان نور المشآعر في محيآها!
ولا فرحوا احبابي ولاغضت عذالي=ولا اتعبت ناس" تعقد لي نواياها .
ولاشلت من لهفة المرسال جوالي=ولآبعت ناس" كثير وضآعت اسماها!
ارخص له اغلا سنين العمر ما آبالي= فدوت عيونه من أولها ليا اتلاها !
بس المهم انه اقرب لي من ظلالي= لو انه ابعد من الفرحه وطرياها !
مشعل الشويش