كثير من الناس شافوا بعض الملاقيف اللي يتعرضون طريقهم لاصاروا يتمشون بالسوق مع أهاليهم، يجيك واحد لابس بدلة ويتبوسم ويتميلح ويسوي حاله أخلاق، يحط الحرمة على جنب وينصى الرجال، ينشب بحلقه، ومعه أوراق ما تدري وش قصتها، يحاول فيك تشترك وتعبي بياناتك عشانك فزت بجوايز وتذاكر وسكن بفنادق بلاش، عاد حنا لاسمعنا كلمة بلاش، نفرمل عند اللي يقولها، الأسهم خلتنا ندور أي شي بلاش الله لا يبارك فيها، ياخذ بياناتك كاملة ويقول لك لازم تحضر الاجتماع حق الشركة باليوم الفلاني، ولا حضرت الاجتماع تلقى السالفة كلها بربسه في بربسه، المشكلة أن هالطريقة يقولون ممنوعة، ويعاقب عليها القانون، بس للحين ما انقطعت من الاسواق، وبعضهم بثر، الا تشترك معاهم غصب، يجلس يحاول يقنعك وانت مو فاضي، والواحد لاصار معاه زوجته ووراعينه يكون ضايق صدره يبي بس يخلص، قلبه يطامر بين ضلوعه يبي يلحق على اخوياه بالاستراحة، كثير من سوالف الجوايز ما تجيب همها، ولا تسوى الوقت اللي تضيعه عليها، يعني معقول العالم يعطونك جايزة عشان سواد عيونك، افهم وخلك ذهين مثلي، خذها من قاصرها وريح اعصابك واترك المطامر ورى الجوايز، حتى لو قالوا لك انك فزت، راح يطلعون الشيب براسك قبل لا يعطونك جايزتك، ترى الدنيا هالايام صايرة صعبة والاعيب الجوايز ما تخلص، يعني ممكن تدربي راسك مصدق انك فايز وضامن القريشات وما تدري الا انهم مقضبينك اقرب مخرج ورايح تعبك فشوش، وبعضهم ينشف حلقك عشان تقبل بربع قيمة الجايزة، وبعضهم يخلي اجنبي يفوز عشان يقبل بدالها بخمس آلاف، لا تقول اني ماحذرتك من سوالف جوايز الشركات اللي ما يفكرون إلا بأنفسهم!
