تراتيل الوقوف

واقف.. هنا..
نفس المكان اللي تركتِ فيه قلبي.. يا منى!
واقف.. هنا..
ما جيت.. ما ردّيت.. ما هادنت رجلي أو يدي..
حتى ظلالي.. ما انثنى!
واقف.. هنا..
وانتِ ظلالك كل ما يكبر بعد.. يكبر بعد..
يكبر احساسي بال فنا!!
اقف.. هنا..
اراقبك.. وانتِ تفلِّين السنين..
وتنثرين.. ايام عمري من يدك.. مثل الخرز..
حبة ورى حبة.. ورى حبة.. ورى.. حبة... ورى!
.. واحساسي اصبه على آثارك ملاها صوت..!
نبت عقب ابتعادك بالطريق.. سكووووت!
وطالت بك خطاك هناااااك.. بحثا عن حياة..
وانا ما زلت واقف لك هنا..
ماخفت بعدك.. كيف أموت!
واقف هنا..
واقول في قلبي على الأرض بتدور..
شمسي تغيب وتستحي.. وتعود تملاني حضور..
لين انتهيت بليل.. بور..
ما ينجمع مع غيره.. ولا ينتهي..
لين امتلا صدري غبار.. وانتظار..
لين أيسّت عيني من قبال النهار...
واقف هنا.. ما.. زلت... ما رديت.. ما قدمت..
.. والله حتى ما ندمت!
ما عاد في قلبي ندم!.. صار الندم محظور..
صار الندم عن حضرتك.. نور.. وبداية ثانية..
وانا تعودت الوقوف بظلمة الليل الطويل.. البور..!
واقف هنا..
تلاشت الصورة تحت قرص الغروب.. وما نسيت.. ولا تهون!
تقطعت وسط السراب اللي حجز بين السما والأرض.. في بعض العيون!
واقف هنا.. ما طبَّق لقلبي جفون..
وما غفى لحظة.. ولا نام الحزين!
واللحين.. جيتي تسأليني... عن مكاني وين؟ يا ذيك السنين؟!
ماني هنا!