ماعندنا بنات للزواج!

ماعندي أي مشكلة مع أي بني آدم يبي يكمل نص دينه ويعرس، لكن احب اقوله بعد موب لازم تخسر النص الثاني في مشاكل مع نسايبك، وصراعات، ومرمطة لبنت الناس تنتهي في الاخير بما لاتحمد عقباه، وكل هذا عشانك ماعندك شخصية قوية وواعية تدير حياتك الجديدة، ولا انت قادر تحمي مستقبلك من تدخلات كل من هب ودب فيها!
بعض الازواج المحتملين ماعندهم استقلالية اتخاذ قرار، كيف بالله راح يتحمل مسؤولية أسرة، وبعض أهل العرسان مايشوفون المسألة على انها مشروع ارتباط بالدم والنسب والقرابة، ولا على انها علاقة انسانية أبدية بين عائلتين لازم يجمعهم التفاهم، للأسف.. هذولي على بالهم انهم رايحين يشترون شي بفلوسهم.. كل اللي يهمهم، ترا العشا عليكم.. وترا القاعة علينا، وترا ولدنا غالي، وش دعوى اجل بنت الناس هي اللي جاية هدية مع تعبية بنزين بعشرة؟
المشكلة لما يجون يخطبون تشوف كلامهم المعسول عن تقدير البنت وعائلتها وتطبيق شروطهم، واول مشكلة تصير ينقلب كل هذا 180 درجة، ويطلع الوجه الحقيقي وسالفة «نتشرف فيكم انتم بالذات» تنقلب «اصلا كان يمدينا ناخذ من غيركم لو نبي».. أما حكاية اطلبوا أي مهر تبونه، وأصلا لو دفعنا مليون شوي فيكم.. تنقلب فجاة وتصير «اقول.. ترا دفعنا المبلغ الفلاني.. مع اننا لاقين بارخص!».