غراميات الغفلة

الشعب يريد أحد يفكنا من سماجة هالاذاعات، ترا من جد غثونا.. سمعنا الأغاني اللي طول الوقت شغالة الين صار عزيزي المستمع عزيزي المشكشك وقلنا يلا ماعندهم برامج وفترة تجريبية، برامج بيع الكلام اللي مالها سنع من النوع اللي يقرق على مخك ساعة بسالفة هو نفسه ماهو فاهمها.. «انت لازم تنجح، وتعيش حياتك..هذولي اللي نجحوا ماهم احسن منك.. طيب وش ناقصك انت.. تبي فلوس؟ ترا الفلوس ماهي كل شي.. الخ». وطبعا كل هالخنبقة مصحوبة بموسيقى يقال لهم بيدخلونك جو حماسي.. ما قلنا شي برضو.. يلا معليش يمكن في ناس فاضية وتحب تسمع احد يطقطق عليها، أما توصل فيكم انكم تستغلون مشاعر الناس لبعض وخصوصياتهم.. وتذيعونها على الهوا لمجرد انهم بعد على نياتهم.. وماشا الله على الواحد فيهم ماعنده مشكلة يفتح خط على كم مليون واحد يسمعونه لايف.. عشان يفضفض بشي خاص.. وش دعوى يالحبيب لهالدرجة فاتح مشاعرك سبيل!
الاذاعات طبعا تقدر هالنوع، وماتقصر معاه.. يختارون له وقت ليلي كويس على مذيعة بمواصفات صوتية معينة تجلس تقرا رسائل العشاق والمهجورين واللي يشاورون نفسهم وتعال شف التصنع المكشوف والاسلوب المفلس..طيب وش ذنبي أنا كمستمع اجلس اسمع مذيعة تنقل اهداء خطيب يقول لخطيبته احبك واموت فيك، وواحد يقول لخويه تكفا سامحني وش دراني انك ماتحب جورج وسوف..واللي مستغربه من جد، واحد يقول حاب يسمع أغنية معينة وهو بجواله يقدر ينزلها في دقيقة!