العبدالله: نحن أمة لا نفهم في نظر الشقيري

شاهد عيان من الشارع العام، على الأعمال الرمضانية ونجومها.. له وجهة نظره تجاه ماتابع من الأعمال وله رأيه الخاص بالطبع.. ومع بدر العبيد دار الحديث التالي:
كيف الحال؟
هلا والله فيك.
تعرفنا باسمك؟
سلطان العبدالله
وش رايك بالأعمال الرمضانية لهذا العام؟
كثير مسلسلات على قل سنع.
وش تقصد؟
يعني مسلسلات كثر شعر الراس والفايده والمضمون ولا شي مجرد ضياع وقت وأخص المسلسلات السعودية.
وش فيها المسلسلات السعودية؟
الحين كل واحد قال إنه نجم أخذ بطولة مسلسل ما يدرون انهم يكملون بعض.
ما انطباعك عن المسابقات الرمضانية؟
ما أتابع مسابقات رمضانية وخصوصا من يوم حطوا عارضة الازياء حليمة في برنامج مسابقات مذيعة.
وش رايك بالمسلسلات الكوميدية؟
أصلا ما أتابع أي مسلسل كوميدي سعودي في رمضان.
وليش؟
ياخي «طاش» هاالسنه قلب مواضيع حلقاته جدل ونقاش في المجتمع وما صار مسلسل كوميدي، صار مسلسل دراما ياخي.
وش تتابع من مسلسلات كوميدية؟
الوقت الذي يعرض فيه «طاش» في قناة الوطن الكويتية يعرض مسلسل للكوميديان الأول ناصر الدرويش.
تتابع أعمالا تاريخية درامية؟
أتابع ولكن بشكل متقطع للعمل التاريخي كليوباترا وباب الحارة.
طيب تتابع برامج دينية؟
أتابع برنامج حجر الزاوية عبر الإذاعة المسموعة وشطبت ها السنة برنامج خواطر.
ليه وش السبب؟
الشقيري شاف نفسه واستغل سمعته الطيبة بمشروع تجاري كوب الشاي فيه ب20 ريالا واحسه برنامج دعائي وما له أي فائدة.
وش تقصد ما له أي فائدة مع أنه برنامج شبابي ويعرض الأمثلة بين البلدان والأشخاص؟
صحيح الفكرة للبرنامج أساسا كانت شبابية لكن تطورت وأصبح البرنامج ينتقد دين وشعب فنحن أمة لا نقرأ ولا نفهم بنظره.
أشوفك متحمس بالنقد ضد المسلسلات والبرامج السعودية في رمضان هذا العام؟
ياخي ملينا من مسلسلاتنا اللي على غير سنع وما لها فايدة اللي عنده مضمون يقدمه غير كذا ملينا ترى.
من النجم التلفزيوني السعودي لهذا العام بنظرك؟
المشكلة أغلبية الممثلين السعوديين ما فيهم نجوم كلهم زي بعض.