مدري من وين نبدا، وش نقول وش نخلي، الشق أكبر من الرقعة، والكلام في هالمواضيع مثل اللي داخل على ناس عندهم عزاء ويحكي عن فوايد فتح الشبابيك وقت الضحوية، وقعد يعدد لهم وش تسوي الشمس بالجراثيم وهم توهم دافنين ميتهم ولا لهم نفس يسمعون أحد يحكي، نبشركم يا مواطنين انه طلع مصلح جديد للسرقة، اسم دلع وإتيكيت طلعوه على نوع من السرقة، بدال ما يسمونه سرقة سموه (متعثرة)، يعني انت لا بغيت كم مليون، تشتغل لك سبع أو ثمان أعوام في البنوك أعلن عن مساهمة عقارية، وكل السالفة كم إعلان ملون بكم جريدة وحط أرقام حساب وتجيك الناس كب زي الرز بالهبل ولا من شاف ولا من دري، بعدين لا جمعت كم مية مليون، قل انك فلست وعلى المتضرر اللجوء إلى القضاء، عاد السالفة لا راحت للقضاء على بال ما تطلع من عنده تحتاج كم سنة تكون انت ربحت الدبل من المبالغ اللي انت لهفتها، عاد ساعتها بكيفك، بغيت ترجع للناس شي والا لا، انت حر، لأن الناس اللي فقدت أمل برجعة فلوسها يحبون ايديك لو قلت لهم برجع لكم نص حلالكم، بعدين لا تصير غبي، على طول قبل لا تعلن إفلاسك، رجع للناس المهمين اللي ساهموا معك فلوسهم عشان ما ينكبونك، باقي المواطنين العاديين، عادي يمسكون سرى بانتظار دورهم في حال المساهمات العقارية المتعثرة، ما حد يصدق أن قيمة هالمبالغ المتعثرة من حلال المساكين وصلت إلى أربعة مليارات ريال سعودي، أبشركم من سنتين تشكلت لجنة اسمهما لجنة النظر في المساهمات العقارية، وهذا شي كويس، بس هاللجنة قدامها اكثر من مية مساهمة (متعثرة)، وش تدرس؟ وش تخلي؟ من هالمية مساهمة المخالفة لشروط نظام وزارة التجارة، والمخالفة للمخ والأعصاب، اكثر من عشرة مليارات من حلال المواطنين انسحبت من جيوبهم وتبخرت وهم قاعدين يشوفون اللي سرقوهم يتمشون قدامهم وعاملين نفسهم بزنس مان ولا يقدرون حتى يحاكونهم، رح يا مواطن وأنا أخوك خذ لك ركعتين بهالايام الفضيلة واطلب العوض من الله، دام الدعوة فيها لجنة ولجان، يعني غني: يا ليل ما طولك، بس انتبه ترفع صوتك وانت تغني ترى اللي سرقك ممكن يروح يشتكي عليك ويتهمك انك تزعجه ويقولك بعين قوية: قصر صوتك البلد فيها نظام، وإذا مو عاجبك شي رح اشتك! قلت لك ما لك إلا رب العالمين خلك من سوالف لجان ودراسات.
