أمي قالت

يمه أرضك.. يمه أرضك.. يمه أرضك..
لا تبيع لو عود يابس.. عود أصفر..
من يبيع ذرة رمل.. يمه باكر باع أكثر..
يمه هذي الأرض أرضك..
هذي نبضك..
هذي أقدارك وحظك..
خل جفنك دوم يسهر..
الوطن ما هو قصيدة تنكتب في قلب دفتر..
الوطن يا وليدي.. أكبر..
الوطن يا وليدي.. كلمة..
تختصر ماضي وحاضر..
تختصر أحلام باكر..
الوطن.. موال أخضر..
الوطن.. أيام حلوة..
الوطن.. أيام عسرة..
بيت وذكرى..
شمس وقمرة..
شوق دافي..
حب دايم.. في عيون الكل يكبر..
الوطن يا وليدي نفسك..
يمه ناسك..
عزوتك وحبال راسك..
يمه.. لا يذبل حماسك..
خل مواعيد الفرح.. تنكتب في يوم باسك..
خل جبين الشمس يا وليدي.. مداسك..
يمه لا تبكي قهر..
لو يكون الضيم داسك..
يمه يا شمعة بلدنا..
إنت يا وليدي سندنا..
يمه وايد زين ساسك..
أمي قالت والصدى ردد وراها..
يمه أرضك.. يمه أرضك.. يعني عرضك
مسفر الدوسري