الشعر وأحبابي

لا تسألوني عن اللي قلت ف أحبابي
أحبابي أكرم من الشعر وكلماته
ألبس غلاهم وهو ستري وجلبابي
ولا ينزعه قول عذاله وشماته
يفوح عطره على روحي وبثيابي
وأحس في صمته أقوى من عباراته
صحيح أنا جلف بعض أحيان وأعرابي
لكني أسيل للغالي وشرهاته
وأنبت على ساقته نوير وأعشابي
ويقطفني أثمار، لو ما حانت أوقاته
عرفت بالدمع وش هي قيمة أهدابي
وعرفت للحب قيمة عبر عبراته
رضيت بالدمع ليت الدمع يرضابي
مقدار ما يستفز الحس حسراته
والدمع وافي شبيه الشعر وأصحابي
كل خذاني بحسناته وسياته
أصد عنهم رماح الصد، وعتابي
وأفرد لهم من كتاب القلب صفحاته
يا صورة الراحلين وصوت غيابي
واديك يقرا على قلبي تحياته
أقبلت له بالغلا طاير وقفابي
وأبطيت أدور على روحي بسجاته
شرعت في ما مضى للغايب أبوابي
وشربت من كأس جياته وغيباته
واليوم ما عاد ميعادي ومرقابي
بدلت فيه الكتاب ونور كلماته