ملجة

بالبلدي

بتروح (1) الليلة ملجة (2) عبدالله في مجلس أبوه، ما باروح ما عزمني وارسل لي خط (3) مع أني عزمته في ملجتي في السنة الماضية.
أقول محمد خلك احسن منه وروح الملجة حتى تكسر عينه، قلت لك مانا رايح ابد، اقول روح طاوعني ابرك لك، ليش في شي حلو .. يمكن في شي حلو.. بس ما حد قال لي .. بس العزيمة بيحضر فيها ناس واجد (4) مثل من بيحضر مثل العمدة والاستاذ في المدرسة واعمامك واولاد عمك.
تحسب (5) يحضر الاستاذ في الملجة قال محمد لرفيقه سعيد.
سعيد ليش الاستاذ ما يحضر اصلا الاستاذ يحب هذه السوالف ويحب يرز نفسه في المجالس مع الناس.
بس ويش دخل الاستاذ في الملجة سأل محمد سعيد: ما ادري ويش دخله في السالفة.. بس عبدالله يحب يتفخفخ قدام الناس.. انا جبت الاستاذ في الملجة.
انا باروح رحت انت او ما رحت.. انت الخسران اذا ما رحت.. نفسي اشوف عبدالله وهو جالس وقت الملجة.. اكيد باموت من الضحك.. عبدوه اللي يلعب التيلة (6) صار معرس الحين.. متى استويت ياجرادة قالت امس العصر.
تدري انا باروح سعيد قالها واللي يصير يصير مع إن عبدوه ما عزمني بس باصير احسن منه هل المرة.
محمد لا تقول لعبدوه ليش ما عزمتني اخاف يسبك قدام الناس. سعيد ليش خايف منه باقول له ليش ما عزمتني على الملجة وباشوف ويش يقول يمكن يقول نسيت أو ارسلت مكتوب مع اخوي نصروه «ناصر».
الكلمات :
ملجة : عقد القران
بتروح : تذهب
خط : رسالة
واجد : كثير
تحسب : تعتقد
التيلة : لعبة شعبية