خيال الضرير

قبل تسأل خفوقي يذكرك أو نساك
اسأل الوردة آخر عهدها بالعبير
أجمل أيام عمري عشتها في هواك
يا اوّل الحب الأول واوسطه والأخير
لا تناقش خطاي! ولا بناقش خطاك!
خلها مثل ريشة في هوانا تطير
كان ف النفس شرهة ثم سيّل غلاك
واغرق الصدر وانزاحت قليل وكثير
خَلّ كل المعاذير القديمه وراك
عاشقك صدره أوسع من خيال الضرير
لا يغرّك عتابي يوم يسنح لقاك
كل ذا.. لجل أطوّل وقت، أشوفه قصير
ودّي أملا عيوني من ملامح بهاك
ف الزعل ف الرضا في كل حاله تثير
ازعلك لين تزعل ثم أدوّر رضاك
أنت لا رقت غير!! ولا تضايقت غير!!
ولعبة البعد أمارسها واذوب بنداك
نادني! وأنت عندي نادني!! لو يصير
معك للعمر نشوه طوّل الله بقاك
سامرية غرامك ف الحشا تستدير
وان طرا الهم واخذتني هجوسي.. هناك
واوصلتني مع الغفلة ظنون المصير
قمت اشاور خفوقٍ حالفٍ ما نساك!
أعرف العقل ما هو للعواطف شوير