تتغشمرين

تتغشمرين؟
كيف اختصر لك ما بقلبي بكلمتين..
وانتي خلاصة هالسنين!
يا غايبه
ما كانت حروفي على بعدك شعر!
كانت عذابات وأنين
كانت سهر
وعيون تستسقي المنام ولا تنام
ولا كان يمطر هالغمام
إلا دموع..
تشبه دموع التايبين
****
تتغشمرين؟
ما لك على حبي قسم
إني ضريت اتنفسك
وما كان صدري يمتلي.. إلا حنين
وما كنت قادر أزفرك.. لو كان ودي أزفرك..
ولا كنت أبي
.. (من باب إنك.. تعلمين)
وما لك على حبي قسم
إني على طول العمر
وأقصد عمر عشته معك
لني قبل ما أعرفك
كل اللي عشته كان «مر»
كم كنت أحسدني عليك
وأسجد شكر
لله إنه صورك
لو تعلمين
وما كنت أبيكي تعلمين
****
تتذكرين؟
يومك زعلتي والزعل طول شهر
من عمري حسبته سنين
مثل الممات
تتذكرين؟
وش كان ذنبي يومها؟
قلتيِ اختصر محبتي في كلمتين
قلي «أحبك مووووت»
وبكل اللغات
وما رضيت!
ولا دريتي إني عجزت
وكيف أحبك مووووت
وانتي لي حياة
وكيف اختصر لك ما بقلبي.. بكلمتين
وانتي خلاصة هالسنين؟
تتغشمرين ؟
أكرم التلاوي