الذنب

لا تسأل الذنب عن راعيه دامك سألت
اسأل غيابك عن اللي تكسبه من ذنوب
غرست خنجرك في صدر الغرام ورحلت
وخلّيتني انزفك وتسيل فيك الدروب
جرّعتني من عيونك كاس ليل وثملت
واتبعته بكاس عصرٍ صبّني في الغروب
علّمتني صدق وش معنى العذاب وفشلت
لا اعلمك كيف عن طعنات قلبي تتوب
لاتقول ما كنت احبك اشهد اني فعلت
كنت آتمنى ولو لحظه بقلبك اذوب
واسري مع الدم بعروقك واذا انفعلت
آهدّي اعصابك بنغمات قلبي الطروب
اللي سرق منك بعضك لين ما اكتملت
في شرق ليله وغنّى بك نهاره جنوب
اصغر من احدود كونه بس يومك وصلت
هو قلب واحد واصبح مملكه من قلوب
اشعل قناديل واغراني وجيت وشعلت
اصابعي شمع وانفاسي نسيم وهبوب
أمرني آشوفك اجمل شي وآنا امتثلت
خلّى عيوني البصيره ماتشوف العيوب
عشّمت فيك اليباس بداخلي ماهملت
وملامح ارضي تحت غيمك كساها شحوب
علّمتك الحب كيف ايكون يومك جهلت
وعلّمتك السلم عادك في خِضم الحروب
أخطيت يومك طلبت تروح وانا قبلت
ودلّيتك الدرب من باب الوصل للهروب
ماكنت احسبك بتتركني كذا ماعملت
احسابي انّك على فعل الخيانه دؤوب
انا اشهد انك تجنيت وظلمت وقتلت
وانا اشهد انك بتلقى الذنب من كل صوب
دامك رحلت اترك الماضي وانا مازعلت
وسهامك اللي رمتني وتركت بي ثقوب
انا مسامح بحق الحب لنّي عدلت
ونهلت منّك غرامٍ كان يكفي شعوب
شكرا على كل جرحٍ طالني واحتملت
ماذقت طعم النجاح الا بفعل الرسوب
والا انت من قمّة احلامك هويت ونزلت
عاري جسد والندم ماعاد يكسيك ثوب
لاعاد تسأل عن اللي راح أنا سألت
الله يبيحك ويغفر لك جميع الذنوب
عبد الله بن شامان