زادت أحزني

اليوم عيد وكلٍ عايد احبابه
وانا حبيبي فلا عايد ولا جاني
ما ادري وش اللي جراله ما ارسل كتابه
معقوله انه نسى اسمي وعنواني
او قصده يحز في قلبي على مابه
او يمكن ارسل مع شخص ولا اعطاني
لا ما اتوقع لكن النفس مرتابه
الاحتمالات انا اوزنها بميزاني
افلان قام ايتشمت بي مع اصحابه
اذا نظرني وشفته زادت احزاني
نظرات بالقلب مثل النار شبابه
نظرة شماته ونظرة حقد عدواني
احس حولي فرح مدري وش اسبابه
هي فرحة العيد والا هو فرح ثاني
هلت دموعي فقالوا الناس وش صابه
قلت الفرح له دموع تهز وجداني
فات الفرح فات والحزن انفتح بابه
حزين يوم الفرح والكل واساني
ملعون ابو الحب ماكنت احسب احسابه
يذلني وانحني من شان خلاني
لو كان عندي خبر بالحب واتعابه
ما كان قلبي رعاه وعشت وحداني
واليوم فرقا وكل وادع احبابه
وانا حبيبي ثلاث سنين ما جاني
سعد بن زنعاف العلياني