العنود

هلا هلا بك يا العنود الترف يا وافي الخصال
هلا هلا بك يا وليف الروح يا شبه الظبي
يا الجادل المياس يا باهي الوصايف والجمال
أنا اشهد انك سالب(ن) روحي وسابيني سبي
كامل مكمل واكتمل وصفك ولله الكمال
نادر حلايا ما تشبه بأعجمي أو يعربي
مشيتك لا من شفتها ما بين ميل(ن) واعتدال
آقول بسم الله عليك ويا صلاتي ع النبي
وخدك ليا مني لمحته في الدجى من دون شال
ما كنه إلا برق وسم وفي مزونه يلعبي
أغليك يا نبع الدلع واغليك يا سيد الدلال
واغليك يا من صدق حبه صار غاية مطلبي
يا من سكن في القلب واعلن سطوته والاحتلال
واسس قواعد للمحبه في فؤاد المعجبي
تبيني اعيش العمر دونك ترى هذا محال
ما اقدر ونيران الغلا في وسط قلبي تلهبي
الزين كله مجتمع بك من جنوبه للشمال
ما لك مثيل في بلاد الشام ولا المغربي
أنا تحت مطلب يدينك سيدي في كل حال
تآمر على كيفك وتنهى ما لك الا اللي تبي
سالم رجا آل عجيان