الفراق ارحم

خلاص .. الفراق ارحم .. ولا عيشة الضميان
إذا هي كذا والا كذا .. كلها فرقى
فمان الرقاد اليا غفيتي .. وانا سهران
وذي دمعة حمرا .. وذي دمعة زرقا
تلون دموعي لك ولو هي بدون الوان
وكم دمعة تنزل .. وكم عبرة ترقى
ولا نمت لين اصبح علي الفراق وبان
ونامت عيوني .. بس نامت وهي غرقا
من الهم .. والضيقه .. والاحزان .. والحرمان
والاحلام.. ولحون المجاريح .. والورقى
تخيرت لك في صدري ارقى مكان .. وكان
بدونك .. لاهوب اجمل ولاعاد هوب ارقى
يا قوك .. ويا ضعفي على الصبر .. والسلوان
بك ايقنت ان بين المحبين .. به فرقا
ياكم موعد فاتك ... واقول اني الغلطان
اجي للوعد بالورد .. وارجع معي حرقا
ياشين انتظارك .. وانتي اجمل من الاحسان
بوصلك .. مهو لأجل انك الجادل الطرقا
خلاص انتهينا وانتي الشكر والعرفان
لك اصدق وانا انتظرك من يديني العرقا
لأني معك صرت اعرف الحمد .. والنكران
وأن الهوى احيان .. اقسى من الفرقى
عبدالعزيز الدهمشي