وبدأت الدراسة

بالبلدي الفصيح

صباح الخير والفل والياسمين ياحبايب... بكرة أول أيام الدراسة وحيبدا يرجع أكتر من أربعة ملايين طالب وطالبة لكراسي الدراسة وحنلاقي الشوارع منعنشة من الصباح ومزحومة بالسيارات اللي فيها الطلاب والطالبات وكلوو رايح على المدارس والجامعات والكليات.. أتمنى من كل قلبي انه تكون كل المدارس مستعدة لاستقبال الطلاب والطالبات بفصول نظيفة وبمكيفات باردة مو مقربعة وحالتها بالبلا هدا غير نظافة الحمامات (الله يكرمكم) واللي المفروض تكون في شركة نظافة معتمدة ومسؤولة عن ده الشي لأنه بصراحة اللي بيدخل لبعض المدارس سواء كانت حكومية أو أهلية يشوف العجب العجاب من العفن والقرف اللي فيها واللي أهم من كده صيانة التمديدات الكهربائية عشان لا نسمع ونقرأ بعد كده انه حصلت حريقة في مدرسة ويروحوا طلابنا وطالباتنا فطيس لانه بعض المدارس المستأجرة من بره الله الله ومن جوه يعلم الله... اليوم حترجع الحياة لطبيعتها بعد ما كانت مقلوبة في الإجازة فوقاني تحتاني الليل كان نهار والنهار كان ليل والله يعينهم على زبط الامبير من جديد... والأسبوع بعد المقبل حنشوف الكتاكيت الصغار اللي حيروحوا المدرسة لأول مرة حنشوف البنت متشعبطة في أمها والولد متشعبط في أبوه ودموعهم على خدودهم من الخوف اللي بيحسوا بيه في أول أيام الدراسة والله يعينهم ويساعدهم على هادا الموال... وبكره حيبدأ المدرسين والمدرسات سنة جديدة مع الطلاب والطالبات وياريت يكونوا خفيفين عليهم في طلباتهم وما يحملوهم فوق طاقتهم بطلباتهم العجيبة والغريبة لانو في ناس عندهم وناس ما عندهم والمهم من كل ده انه يسلموهم جداول الحصص على طول عشان لا يتعبوا بناتنا وأولادنا في شيل الكتب كلها عشان لا يكسرووا ظهوورهم لانه الرحمة حلووة... وحبايبنا رجال المرور مسؤوليتهم حتكون زايدة حبتين لانو الشوارع حتكون مزحومة بالسيارات والحكاية يبغالها شوية تنظيم سواء كان التنظيم في الصباح أو بعد الظهر والله يكون في عونهم ويساعدهم على الهيلمان اللي حيشوفوه في أول ايام الدراسة... وحيبدا الزحام في كل المكتبات لانو هادي الأيام موسمهم وشوف واسمع عن الأسعار اللي بتقصم الظهر واللي بتختلف من مكتبة لمكتبة وما في إلا دبح في خلق الله وكلوو ببركة وزارة التجارة... المهم بعد كل اللي قلناه نتمنى من الطلاب والطالبات أنهم يبدأوا سنة حلوة مع مدرسيهم ومدرساتهم مو نجي نقرأ والا نسمع بعد كم شهر انو طالب أو طالبة اتضاربوا مع أساتذتهم عشان أمور تافهة ما لها لا طعم ولا معنى لانو الشاعر بيقول: «قم للمعلم وفيه التبجيلا ... كاد المعلم أن يكون رسولا)
أسأل الله سبحانه وتعالى التوفيق والسداد للجميع... وعيشووا كتييييير تشوفوا كتييييير.
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة