درب الهوى

ياللي عطيت الحب كثر اللي خذا
راحت حياتك كلها شوق في شوق
لاترتجي في دنيتك هذا وذا
خل الرجا بالله ترى الخل مخلوق
اصبر على همك ترى الدنيا كذا
فيها الفرح كنه من العمر مسروق
وان تهت في درب الهوى ياحبذا
تبعد عن ادروبه ترى طيحته عوق
ان جاك خل في غرامه يحتذى
عطْه الغلا لكن ... بلا عجْل وبذوق
واستر وله حبك عن عيونه إذا
شفته على قلبك يسوق الهوى سوق
خذ من ورود الحب مزيون الشذا
واللي بقا رده عن النفس برفوق
الحب لاهو ماء ولاهوب الغذا
(الصبر زين وكل مطرود ملحوق)