التجارب

يا لبيب القلب جعل اصغر طموحك فداك
انتبه قدام تاقف على بيبان افا
التجارب تنقذ الرجل من درب الهلاك
والطريق اللي يودي القمم شوك وحفا
لجل لا يصغر مقامك ولا ينقص غلاك
ولجل لا تصبح ضحيه لهراج القفا
انتبه من ساير الناس لا تلحق مداك
وانتبه من نظرتك لا تجي تحت الشفا
التجاهل بعض الأحيان يرفع مستواك
والمودة بعض الأحيان يتلاها الجفا
اهتمامك لا تعيره لهذاك وهذاك
حاول ترسخ بقلبك قناعة واكتفا
واحدٍ يحزن لحزنك ويرضى من رضاك
كلما زادت ظروف الزمن زادك وفا
والخوي اللي ليا طالت الطرقه نساك
ان توخر ما وفا وإن تقدم ما كفى
كم خوي تحسبه قبل ربعك واصدقاك
غير لا جات اللوازم تغير واختفى
قد مللت من الميانه وكثر الاحتكاك
كم وكم جاملت والجو عيا ما صفا
والرفيق اللي يقا شرك ويكبر خطاك
لا عفيته ما شكر وان طلبته ما عفا
جنبه وابعد عنه واحذف اعلومه وراك
واشتر بخوته من قاصي الناس احلفا