يا دكتور

لا تسأل وش اللي نزّل الدمع يا سلمان
لا صار الحزن في داخلي جبره وكسْره
كسرني دخوله ف العنايه وهو مرضان
ياوجدي على اللي صابه وحسرتي حسْره
ماخفف علي من ضيقة الصدر والأحزان
سوى شوف خلق الله بالأحزان منكسْره
على كثر ما ييسر على الربع والضيفان
تعيش العرب في يسر ربي وفي يسْره
بعضهم لامنه مرض فقده على العربان
وبعضهم لامنه مرض فقده على الأسْره
يا دكتور تكفى لا تعسْره وهو زعلان
ترى ما هو ب يستاهل إن أحد يعسْره
يا دكتور تكفى روف ب القلب والشريان
أنا ودي أخسَر كل ما أملك ولا أخسْره
هذا القلب مهب قلب عادي يشيل إنسان
هذا القلب عندك شايل العالم ب أسْره