جسر الغلا

مبروك بن سالم بن ماضي
وش ذنب هالناس دون إحساس تشغلهم
وِتحط بفؤاد كل من يعشقك حسره
ماتدري إنك بصدك دوم تزعلهم
كم قلب عاشق تسببت أنت في كسره
جيت أشتكي منك ظلمك لاني أولهم
واقدم سجين إلجمالك عائش إبأسره
الله من طرفك النعسان لي سلهم
أتوه مدري يميني وين واليسره
وأنسى همومٍ كثيره كنت شايلهم
واحس باليسر بعد الضيق والعُسره
لعيونك السُود شكرا يامكحلهم
أشوف فيها حلاة العالم إبأسره
أسألك بالله تسمح لي اتأملهم
وامد بيني وبينك للغلا جسره
وإن كنت تخشى من الحسّاد وحْيلهم
زين أعتبرني معك واحد من الأُسره
يا نبض قلبي ويا بعد الملا كلهم
أخسر بك الناس إلاّ أنت ماخسره