الليل

والهاجس النادر وكيف الدلال
يا كم عطتني علوم وجا وراها علوم
البس افكاري العذبة ثياب الكمال
واطش عن عاتق احساسي ثياب الهموم
قلبي يقول الليال البيض كل الليال
وعيني تقول الليال السود مع كل يوم
احيان احس اني الرجال سيد الرجال
وأحيان احس اني الطفل الغرير الخدوم
احلم واقول الحمول الكايدات احتمال
واصحى وفِي متني من احمول وقتي وسوم
اكرمني الله وسموني كرام السبال
بالاسم الاول وقسمي من خيار القسوم
اعاند اللي يعاندني ولاله مجال
واطلع عن الصحصح القاحل علو الرجوم
واشرع الصدر وأعارض هبوب الشمال
وانزل من الرجم وأعارض لفيح السموم
وقتي عروقه من عروق السلم والسيال
وقلبي من الزيرفون اللون والا الرسوم
خاشرت قيس الملوح في الهوى والهبال
وأثر الهوى والهبال أقران وإخوان توم
وغنيت مثله وليلى ماعليها جدال
اسم لحاله سوات النور خلف الغيوم
دلوعة الحسن والمنسب وتاج الجمال
من حسنها الشمس تخجل والقمر والنجوم
والبارح الفاتنه ست الحسن والدلال
مرت على البال حلم وياه يا للحلوم
ان قلت هذي حقيقه صاح وقتي خيال
وان قلت هذا خيال اطيح ساعه وأقوم
واقول ما عاد فيني للخيال احتمال
أصوم وأفطر على ذكراه وأفطر وأصوم