قولة الحق

احذر من اللي قام والناس نايمه
متهجد يشكي على الله ظلايمه
كم دعوةٍ مضمونها الخوف والرجا
من واحدٍ نفسه عن الظلم صايمه
على الغمامة لين تصعد وتعتلي
والله ما يرضى لعبده هضايمه
يدعي عليك الله والله عادلٍ
يقصمك ما يبقى لباقيك قايمه
خلك مع الله كل ما عسعس الدجى
واللي معه تقوى بربه عزايمه
تنزاح عن قلبه همومه وضيقته
ويخف حملٍ فوق متنه يزايمه
اللي عرف باريه في ساعة الرخا
ما يتركه مولاه والوقت ظايمه
كم اشعث لا قام في ليلة او دعا
يجيبه المعبود ما كثر نعايمه
وكم واحد في قولة الحق صارمٍ
ما تاخذه بالحق لو مات لايمه
فسبحان مجري الفلك في هايج البحر
تمشي بامره تمخر البحر عايمه
وسبحان من سبح له البرق والرعد
حتى الطيور اللي بالأجواء حايمه
يعلم خفى نفسك ويعلم بجهرها
يمناه مبسوطه ونعماه دايمه
ربٍ على عرشه عظيمٍ ومستوي
يرفع سمواته ويرسي دعايمه