ضيقة البال

سافرت لك يا دبي من ضيقة البال
وجيتك وانا يا دبي ضايق ومهموم
وطافت ثلاث ايام ماغيرت حال
لو قلت مستانس ترا الخافي علوم
يابو محمد دمت يا طيب الفال
في خوتك بالعون مايلحقك لوم
وسيع بال وترخص الحال والمال
وفي لازم الخطوة على طول بتقوم
واخوك ابو مشعل ليا قال ما مال
معك على الرفقه وانا اقولها دوم
ويا الله عسى الظهران يسقيه همال
يمطر على الدانة من الوسم ديموم
دارٍ لنا فيها معزه ومدهال
ملفا الرجال اللي عزيزين وقروم
تلفي على طيبٍ واباريق ودلال
عقب الشحم على صيانيه مردوم
وان زاد حبي للولع لابس الشال
العين وان ماشافته تكره النوم
على العهد وافي من اول ولا زال
طيب نباه ولا حكوا فيه محشوم