لآلئ شعرية

يا شعر وش باقي من البدع والرد
ماظن به جزلات محدٍ وجدها
سبحت في بحورك مع الجزر والمد
واحرمتني صفو الحياة ورغدها
لو ان لك لذة مثل لذة الود
ود القلوب اللي مقفّي سعدها
بدايته مرباع بدوٍ على عد
جذابهم برق المزون ورعدها
ونهايته فرقا ودمعٍ على خد
وضعون كلٍ شفها في بلدها
ماهيب لا فرقا ملاله ولا صد
لكن مقاديرٍ تجي في وعدها
قصرٍ من الأوهام يُبنى وينهد
في حسبة ايامٍ قليلٍ عددها
هذي الحياة وكل فتره لها حد
تاخذ وتبدا الفترة اللي بعدها
سود الليالي كلما طول العد
تبحث خفايا الآدمي لو جحدها
حتى لو انه مابعد باح بالسد
والنفس عن حاجاتها من نشدها
لكن ليا حان المفارق ولابد
اللي يجي من بعده امر وادهى
لابد مانُسأل عن المزح والجد
في يوم تسهى المرضعة عن ولدها