لآلئ شعرية

الصبر زين وكل مطرود ملحوق
دام النجوم العاليات بسماها
يا هاجسي برفوق لا قلت برفوق
ما هيب لحية علها يا عساها
ولا هيب لحية وين غيّبت يا شوق
ولا هيب لحية مت انا من غلاها
هجس القصيد يتوق صوبي وانا اتوق
بسم الله الرحمن في مبتداها
رعادها رعاد وبروقها بروق
لا من حداها الشاعر اللي حداها
كان القصيده بنت عزٍ وغرنوق
حلّيبها حلّيبها لعنباها
لا جاتني حطيتها داخل الموق
والله يحييها ويحيي نباها
لها علي حقوق وانا لي حقوق
والاّ بلاش امن القصيد وبلاها
ما نيب اعدلها على كل طاروق
الين اجنّنها وابيح خفاها
الفكر شاشة عرض والقلب صندوق
يعني على ما قيل بير وغطاها
ياهل الوثايق جاكم العلم موثوق
نصيحةٍ ياخذ بها من قراها
ترى النصيحه كان في ساحة السوق
معروف بايعها على من شراها
لو كل روضٍ به خزامى ورقروق
محدٍ شكى الدنيا ودورة رحاها
والمنخنق لا قال ما نيب مخنوق
تشهد عليه العين لا هل ماها
والحر يخدم دام له وكر وسبوق
ولا الحديا عيبها في حداها
والرجل فعل وطيب موقف ومنطوق
والمفلس اللي ما يحصل حداها
لا تبدي اسرارك على كل مخلوق
الناس ما تدري وش اللي وراها
عليك باللي طلعهم دايمً فوق
اللي عن الزلات تكرم لحاها
خلك عسر وارقى على كل شاهوق
وسلم على اللي لا رقاها رقاها
واحذر تخاوي من تجرد عن الذوق
اللي بزلات اللسان يتباها
تلقاه بين الكذب والزور والبوق
وباقي علومه كلها ما خزاها
يا عوق يا بعض الرجاجيل يا عوق
اللي تثوّر بندقه في اخباها