ياليل من قبل لا يهزمك نور الصباح وتنام عينٍ عليك تهل عبراتها خفف عليها مواجعها وداو الجراح اللي بلتها بها بقعا وصكاتها واشعل قناديل فرحتها وقيد سراح هموم تربط مع صدري علاقاتها تطعن بصدري مثل طعن الحدب والرماح وتدمي خفوقي مضاربها وطعناتها اجذب رسنها وانا ناوي بكبح الجماح وتعن صدري قساوتها ولوعاتها من دون حلمي تعاكسني هبوب الرياح الين ملت طموحاتي متاهاتها كم حلم شرف على رجم التماني وطاح وكم حلم قيد هل الهقوه بهقواتها ماعاد للعين من ماضي الليال الملاح يكون ذكرى على هامش معاناتها لامنها خايلت برق السعاده ولاح يقصر خطاوي أملها كثر عبراتها ياليل مالي بعد غيبتك صبر وكفاح وعيني توصل بعَدك آخر محطاتها لا ضق بالي يضيق ولا استرحت استراح وما كل نفسٍ تجملها طموحاتها لامن سهرتك احس بقمة الارتياح ونفسي توصل من الفرحة لمشهاتها
