أحبّه كثر ما أتعبني

وما كان الغياب أجمل ولكن غبت
أنا الباهت حضور المُلفت غيابه
أحبّك وانت بغيابك بعد ما تبت
وأنا لو شبت قلبي ما بعد تابه
تعبت مْن انتظاري في رجاه وخبت
عناوين الجفا كانت على كتابه
تبلّد كلّ ما فيني وما عاتبت
حضورك أو غيابك شبه متشابه
معاك أعذار لغيابك ولو ما جبت
عذرتك وأصدق الأعذار كذّابه
أنا ما خفت تجريحك أخاف إن طبت
وأودّع قلبي اللي ودّع أصحابه
أحبّه كثر ما أسأل ولا جاوبت
أنا فباله ؟.. أنا باقي من أحبابه ؟
كبرت إلا على حبّه بعد ما شبت
أحبّه كثر ما أتعبني غيابه