قصة غيابي

يبحر بي الليل في جوك على اعصابي
واهيم من دون سكه وارقب اقدومك
اليا نشدك الوله عن قصة غيابي
قله عجز من غلاك الطاغي ايلومك
يكفيك انك وحيد وفارس احبابي
واني ليا ضقت تبهج نفسي علومك
تدري انه احيان تطبع طيفك اثيابي
واشوفها لين تضني عيوني ارسومك
البعد عني لا هو سبتك واسبابي
اقدار واظروف وهمومي مع همومك
أهم حاجة ليا من القمر غابي
يمي تذكر غلاي وسامر نجومك
واكتب قصيده تثير الحس واعجابي
من نبع وجدك ومن شوقك ومنظومك
طير لعين الوله من شوقك اسرابي
خل الغصون الحزينه تلقف سهومك
وافرش للامال لقيا واسأل عتابي
وش جارحك لين ضاقت عندك عزومك
ما عاد للصبر قيمه ناخت اركابي
اما التفت أو تسهل لملم حلومك