برد حشايا

من البحرين ومشاركة هي الأولى معنا فمرحبا به
يادمع لا انصبيت من محجر العين
كفكف بكا قلبي وبرّد حشايا
مدري لِمْه من غاب عن ناظري الزين
جف القلم وأحدث بروحي بلايا
جسمي نحف والناس لو صبت لاهين
ماحدن درى وش داخلي من سوايا
ناهيكما عما تذوقت من بين
وعما غشاني من سقم من جفايا
أمنتهم من زود طيبي بأمنين
وأعطيتهم مني جميل السجايا
وماشفت اقسى من فراق المحبين
بالذات لاصاروا بعدها عدايا
ناسين ود اللي جعل ودهم دين
ناسين طيب القلب بيض النوايا
وياما ترادفنا بالاحلام غافين
في كوكبٍ فيه المنازل سرايا
وياما تكرر اسمهم بالتلاحين
وماكنتِ عارف وش نهاية رجايا
وخابت ظنوني وذوقوني الامرين
مر البعاد ومر داي ودوايا
وآخر كلامي قلت يامحجر العين
كفكف بكا قلبي وبرّد حشايا