ثلاثة أيام

يا كثر الكلام اللي كتمته وصار البوح
دخيلي ووجهي دون عرضه من الأقلام
وأنا يستثير ضلوعي الورق صوت النوح
سرى خافقي فوق البسيطه ورف وحام
وعلى كل ديره مرها بالوريد .. يلوح
يدور يمين تبادله من حدى الأنام
رجع لي ولا عيّن من الغايه أي مصلوح
يا قلبي تريّح دام نبضك تغط ونام
أناادري الزمن دوار وان الأماني طوح
لكني ذخرتك للمهمه ذرى وحزام
وقال أبشر وبيني وبينك عهد مشروح
وقلت أبشر وكلي على أوامرك خدام
وقال الغضب ممنوع وان الخطأ مدموح
لجل صاحبك ولا من تواجهه قدام
ولا تفتح المصكوك ادخل مع المفتوح
ولا تؤمن بحظ و وساطه ولعب أرقام
ولا تشتم المذموم أو تمدح الممدوح
قبل ماتشوف لفعلهم بصمة الإبهام
وتممت له ثم قلت انا أستأذنك بروح
وبيني وبينك والعهد وقتنا اللوام
مشيت ونصتني ياعرب رجفة الملفوح
تداركتها أمشي وكني بدون عظام
توارت صروح وجاء بعدها كثير صروح
وصابر على عهدي لقلبي مدى أعوام
لقيت الحسد عند الأوادم يرد الروح
ولقيت الطمع كلٍ على سكته مقدام
ولقيت الصدق مرفوض وان الكذب مسموح
والأخلاق محكومٍ عليها بصك أعدام
ولقيت الريا أعلام وأن الجمايل شوح
ولقيت العدل مقعد لقيته بدون أقدام
ولقيت البغض بين القرابات مثل الضوح
وما كنهم عاشوا على ملة الإسلام
تعبت ونقضت العهد من خاطرٍ ملحوح
وانا دمعتي ماتشبه إلا دموع أيتام
وصارحت قلبي قلت وبصوتي المبحوح
ماعاد اقدر أواصل شبعنا من الآلام
رحل من هذاك اليوم عايش بليا روح
بعد مارحل ماعاد أدقق ولا أنضام
وش أرواحنا من دون حب ووفاء ومزوح
الأفضل نعيش ونعتبر نفسنا أصنام
الأرواح تفنى والعمل وحده المنقوح
فلا تجعل الدنيا تموّل عملك آثام
رساله من الأعماق للعالم المجروح
نبي نتفق ونحب بعضنا ثلاثة أيام