خلاص ارحل

ما قلت لك يا عديل الروح
ذيب الجفى بيننا عاوي
ارحل ما دامك نويت اتروح
واسري مادام القمر ضاوي
دامك تبي تبتعد مسموح
عندي ترى الوضع متساوي
اصويحبك يالغضي طحطوح
وش عاد لو كان فوضاوي
بصبر ولو صرتبك مفضوح
ياللأسف ميسمك كاوي
قسمي بحبك ألم وجروح
ضحّيت لك وأحسبك هاوي
دمعي على وجنتي مسفوح
ماحسبك لطعنتي ناوي
ماشفت من عشرتك مصلوح
تجرح ولا عمرك تداوي؟
صبرت لكن لحقني فوح
كبدي شواها مية شاوي
شرحت لك خاطري بالبوح
نشرتها وقصّها الرواي
اجفيت باب الهوى المفتوح
قويت لو ماني بقاوي
خلاص ارحل وانا باروح
وضعي معك صار مأساوي
ارحل وذنبك معي مدموح
وماني مترجيك لي تاوي
ارحل مادامك نويت اتروح
واسري مادام القمر ضاوي
نسيت أخبرك يالمملوح
نفسي ترى نفس بقعاوي