ربع ساعة

يا مصدر أفراحي ويا بزغة النور
ليه الجفا والصد ليه القطاعه
أحسب ثواني الوقت وأيامي إدور
هجرك سنة والوصل بس ربع ساعه
ليه البعد يا زين والظلم والجور
يا مالكٍ قلبي وشوق اندفاعه
ما حن قلبك يوم تشتاق وتزور
العمر يمضي مو خسارة ضياعه
يا منية الخاطر أنا حيل مكسور
إحساسي الجارف وتفهم طباعه
أول تحاتيني ولو حالت إبحور
بينك وبيني تحتويني في براعه
قيدتني بقيد الهوى صرت مأسور
حرب المودة واشتياقي وصراعه
إن كان غيري يكتب أشعار وسطور
أنا حروفي صدق ما هي إشاعة
رحماك باللي يرتجي لحن لطيور
معها يردد ماضياته ومتاعه
فدوة لعينك عمرنا راح مهدور
زود المتاعب زاد بي التياعه
وألا الصبر يا زين بالعون مقدور
ضحك وسوالف مع بواقي الجماعه
يا الله عساك تعود يا خل مشكور
يا بعد عين الحي لو ربع ساعه