وضّاحة جبين

كم لي أجامل وأنا قلبي حزين
واعسى قلبي بيسلا واعساه
فاقدٍ فالوقت وضّاحة جبين
الجبين اللي يشعشع من حلاه
حسرتي بغيابها حسرة سجين
ضاهده وقته وضايمته عداه
فاتنٍ يزهى جسدها كل زين
مثل ما تزهى مفاتنها العباه
فيها من وصف الصقر لفته وعين
وفيها من وصف المها عنّق المهاه
وخصرها اللي راوي دقّه ولين
من نحوله ممكن انك ما تراه
يوم تمشي كنّها تاطى بطين
كل ما منها يشدّ الانتباه
يا معين اللي فقدها يا معين
ساجدٍ قلبه ورافع لك يداه
وصلها جنّة حشى واكمال دين
وفقدها عنده مثل فقد الحياه