جرح الشعور

عرفتني بحاضر وآمر ولبيه
واليوم أنا بعطيك فكرة عن ال لاء
ما عاد باقي للعتب والمشاريه
بابٍ يسولف للهبايب والأضواء
أحيان أشوف الحال في غربة التيه
أفضل ولا بذلي على كفّ مستاء
جرح الشعور يشيل نزفه من أيديه
وصمت المشاعر بوح في بخل الأغراء
يا خي حرام اللي بروحي تسويه
والا تبي هالروح تتقسّم أجزاء
سيفك بعد طعنك طلبتك تخليه
ما عاد بعد السيف يا طاعني داء
يعني لو الدنيا تميته وتحييه
ما عاد باقي حيل يستلطف أهواء
لا يعجبك وصل تشدّك حراويه
حتى ايش لو تنبض فتافيت الاشلاء
كنت اتفانى فيك من باب توجيه
وأثرك تزف الكره في وجه الاطراء
وكنت اتحمل شذرةٍ منك يا هيه
مثل الصبر فيني مثل صمت الأشياء
وإذا نطق فيني من الحرص لك ليه
كني هدمت الطيب في عتمة أجواء
تدري متى تشعر بجرحك وتخفيه
انك تحب وكل ما حولك أعداء