أكبر حسافة

ان خابت الهقوه تغيب المشاريه
واللي انعقد من حبل ربك يحله
طيبٍ فعلته لا تجي في حراويه
ان ضاع بين الناس ربك يدله
ماكل من يفزع مع الخير ناويه
بعض العرب في فزعته لك مذله
وما كل من عاداك تجني بلاويه
بعض المعزه تبتدي عقب عله
وطاري المحبه انتبه تبتلش فيه
كم من خفوقٍ مات باسباب خله
يا عزتي للي شكى بعد غاليه
جملة زهابه جرح مبطي يشله
كم ساهرٍ مستوحشٍ في لياليه
لغز العناء مشقيه ما جاب حله
وعلم الليالي بحر ما عاد غاديه
واللي يعسف النفس ما داس زله
وعرف الرجال افعال كلٍ وطاريه
احدٍ يحط السيف واحدٍ يسله
كم من قريبٍ مغترب وسط اهاليه
وكم من غريبٍ موطنه في محله
هذا الزمان ولا بيدينا نقاضيه
حكم القدر والغيب نجهله كله
اكبر جماله واحدٍ كنت هاقيه
واكبر حسافه دمع عينك تهله