مركب غلاتك

تكلموا واخذوا من الذنب عني
حسْناتكم لي من وراها طماعه
يكفيني ان اللي بهرجه طعني
طعنة ردى ماهي بطعنة شجاعه
من فضل ربي هرجكم ماشحني
عندي من - ضعاف الروابع - مناعه
صحيح لي كم حلم ما قد وصلني
وصحيح لي دربٍ عسير إنقطاعه
لكن يكفّيني من العمر إني
قنوع حتى فوق حد القناعه
يشفع لي ان الحلم يا صغر سني
ما حققْته أربع وعشرين ساعه
الا مع اللي فيه ما خاب ظني
اللي متاع الكون .. يفدا متاعه
أجيه مثل الحل لو ما سألني
وأهيم باستحيائته واندفاعه
وان حدني منه البعاد وغبنّي
مالي علاج إلا بضمة ذراعه
يا اللي لو يشين الدهر ماخذلني
مركب غلاتك (نجدته من شراعه)
يفدا غرامك .. من عذلك وعذلني
ويفداك دمعٍ يشتكي من ضياعه
حتى لو ان طاري غيابك قتلني
ما قلت يا فرقاك: سمعٍ وطاعه
ما تبعدك طول المسافات مني
قريب لو طال السفر والقطاعه
وماني بخايف يوم قفّيت لأنّي
ودعتك اللي مايخون الوداعه