دقات قلبي

اليا بكت عيني على روس الأطلال
جا للعتب فالصدر صوله وجوله
اخيل لي برقٍ من الوصل شعّال
اسامره بالشوق وارقب هطوله
العام انا في مربع العشق رحال
وارهي بشي اليوم ماني بحوله
نجعت للمرباع يوم الثرى سال
والبدو لا طاح الربيع انجعوا له
واخذت لي من صافي الود فنجال
النار تسرج والذلول معقوله
واللي حضن عنقه من النور سلسال
ما لذّ من سالفته الا قبوله
انسى لذايذ قول غيره لياقال
ولا يخلد فالذاكرة غير قوله
حاول ما تثني عوده النسمة ومال
وثناه شرهة طول شعره وطوله
زالت ليال الوصل والهجر لا زال
يدق مع دقات قلبي طبوله
شدّ بمشدّ المترفه قلب رجال
والقلب تشديده ما هو بالسهوله
تفرعنت بنت الترف كبر واجلال
أنوثةٍ تمنع بهيبة رجوله