مرثية

في المغفور له بإذن الله عيد بن ناصر بن قريش القحطاني رحمه الله وأسكنه فسيح جناته
الآدمي ون صارت ايامه سنين
......غافل يظن ايام عمره مديده
هو ما درى ان عادة الوقت يومين
......لا صاد يوم اليوم الآخر يصيده
لابد من يومٍ يوفّا به الدَين
......وينفّذ الله دبرته في عبيده
مكتوب والمكتوب نقراه بالعين
......لابد ما يقرا سواة الجريده
حنا على ما يكتب الله راضين
......راضين والله يفعل اللي يريده
يا والله الا راح طلءق الحجاجين
......وعز الله انه غاب عنا وليده
راح الكريم اللي يحب الكريمين
......الطيب ساسه والكرم في وريده
خويه ان خاواه والخط خطين
......والله ما ينسا مقامه وجيده
يا ليت عيد 00 استغفر الله 00عيدين
......لا مات نلقا عيد لو هو حفيده
له رفقةٍ تلقا بها العطف واللين
......وعنيد لا جات الامور العنيده
وحكيم لا جا الراي ثم صار رايين
......يجيك باشوار الرجال السديده
يقول حاضر ما بعد قال بعدين
......يوم ان ولد اللاش يكنز رصيده
عيد يحَضر واذا بدا الواجب يبين
......لا غابت رخوم العيال البليده
اللي عن دروب المراجل بعيدين
......والمرجله عن عيّنتهم بعيده
ناصر 00 كلامي اسمعه واحفظه زين
......الصبر عند المعضلات الشديده
اصبر وتلقا لا صبرت الثوابين
......وخلك مثل روس الجبال الوتيده
لا تحسب ان فقده عليك انت ذلحين
......علي الطلاق انه علينا فقيده
يا الله يا قابل صلاة المصلين
......يا من ختام آجال الآنام بيده
يا منزل القرآن حقٍ وتمكين
......وسنة رسول الله شرع وعقيده
انك تبيحه قولو آمين آمين
......عسى مقرّه فالجنان الخليده
مطر بن عيد بن مطر