رحلت يا عمي

الشاعر: نواف الصخابرة

مرثية في العم نفل بن فهد الصخابرة رحمه الله رحمة واسعة وأسكنه فسيح جناته..
بسم الإله مكون الكون تكوين
الخالق الرازق منشي الخيالي
الواحد المعبود رب الثقلين
فردٍ صمد علام غيب الليالي
ومن بعد ذكر اللي له الخلق راجين
عبرت عن حزني عقب فقد غالي
وعزيت نفسي قبل أعزي الموالين
والدمع من عيني على الخد سالي
على فراقك يا طليق الحجاجين
والله يعلم بي ويعلم بحالي
واصبر وانا ما لي على الصبر تمكين
يا حيلة الله ما قويت احتمالي
رحلت يا عمي وبالحكم راضين
والعمر لو طوّل قفاه الزوالي
مرحوم ياللي منهجه يعجب العين
الطيب ساسه والفعايل جزالي
طبعه حليم ومنطقه دايمٍ زين
من طيب ذاته ماشٍ بالعدالي
له سيرةٍ عطرة بكل الميادين
بالدين والأخلاق والفعل عالي
وش عاد لو بكتب بفقده دواوين
يكفيه حب الناس أول وتالي
يالله عسى قبره ورود وبساتين
وتثبته يا رب عند السؤالي
وفي جنة الفردوس جنب النبيين
ويفوز في رحمة عزيز الجلالي