حدود اللباقة

ياصاحبي عذرا ً ترى القلب مغتاض
إن كنت متجاوز حدود اللباقه
أرجو السموحه للشعر بعض الأغراض
ودي اسجّل من حروفي بطاقه
جتك المشاعر من صدر ضاق ثم هاض
يمكن يروح ابعيد خارج نطاقه
بالوقت هذا تنتشر بعض الأمراض
قلّوا هل الشيمات واهل الطلاقه
وثوب الكرامه من بعد كان فضاض
ضيّق من اسباب الجهل والحماقه
الناس للدرهم تراكض تركّاض
تتعب من اسباب الطمع والشفاقه
قلبك وقلبي يارجل ليت يعتاض
دام النفاق اليوم اصبح لياقه
إلى متى والخلق بالحيل تغتاض
ولولا المصالح مابنينا علاقه
لاترفع عويّض على حساب عواض
لو يزعل المعتوه مكسب فراقه
ماقدّره مولاك خلّك معه راض
ذي قسمتك بالجاه والا الصداقه