جرح ينزف من تصاريف الليالي

لا تعاتبني على كثر انفعالي
وانت لك في داخلي قدرٍ وقيمه
حس فيني يا حبيبي انت غالي
ما طلبت الا مشاعرك العظيمه
في غيابك ليت تدري وش جرالي
امست الشفّه من الضحكه يتيمه
مابقا للصبر فالقلب احتمالي
لو نظرت بداخلي مسرح جريمه
جرح ينزف من تصاريف الليالي
ينتظر من حضرتك نظره رحيمه
المحبّه قدرها بالحيل عالي
ولك فديتك داخل ضلوعي مقيمه
باسألك اليا ارتخا حبل الوصالي
كيف تصبح بالجفا روحي سليمه
بعد ما شيّدت من حبّك جبالي
لا تقول ان الغلا دقّه قديمه
للزعل ما ودّنا نفتح مجالي
خايف الضيقه عواقبها وخيمه
ما اظنّك تهتني ويضيق بالي
وانت تدري مدّت يدينك كريمه
عادل سليمان المخلفي