عزيزي الرقيب.. «اجلس تقهوى»

عزيزي «الرقيب» قل لا إله إلا الله وتعوذ من إبليس، وش رأيك تسحب لك كرسي ونجلس نتقهوى؟ وإذا ودك نفرش الفرشة ونتربع ترى ما عندي مانع. أنا مبسوط بصراحة مبسوط بشوفتك، بس أنت قول لي وفضفض لي، من اللي مزعلك؟ أشوفك هاليومين مرتفعة نسبة الحجب في دمك، عسى ما شر؟ تراك غالي ولا ودنا نشوفك زعلان، يا بو «محجوب» اشرب فنجالك قبل يبرد، واسمع مني هالكلمتين، لازم نتفق على نقطة طال عمرك، إن حجبك لا يزيد الموقع إلا زيارة ولا يزيد صاحبه إلا شهرة، وأصغر متصفح للإنترنت يعرف طريقة تجاوز الحجب، متفقين على هالنقطة طال عمرك؟ طيب دامنا متفقين، ودامك عارف إن حجبك ما منه فائدة، ليه الحجب على أدناها (حاقة)؟ على كيفك؟ خلاص خلاص آسف والله آسف، بس أهم شيء لا تحذف الفنجال.