صمت صورة

لا قريت من العيون ولا سمعت من الشفايف
ولا خطفت من الملامح ما يبين لي ولاك
صمت صورة واختلال ببرمجة كل الوظايف
وانحلال من العواطف واقتراب من الهلاك
واستعادة أمر واقع مع نهاية حلم زايف
واتضاح ان المشاعر ما لها داعي معاك
يا لطيفة أو عنيفة تنتحل دور اللطايف
في غباش من المعالم همها نسج الشباك
تطلبين الوصل وانت والجفى ربع وولايف
والعطا وانت ترى أكثر من تظنين بعطاك
ماني برواز لمشاعر ماني بريستيج هايف
لي كياني وبمكاني عايشاً عمري بلاك
جاهلة باسمى المعاني مادريتي الحب نايف
يعني ما بيني وبينك فوق حتى مستواك
لو بغيت العب لعبت وتعرفي ماني بخايف
اقدر اقلب ما بغيت من المسائل من وراك
لكن المبدى عزيز وعزتي فوق النوايف
والمسار بخط واحد لا هناك ولا هناك
ومسالة اني اعوفك ايه اكيد اليوم عايف
وبصراحة صار قلبي يهتوي شخصا سوماك
عاشق الزين المدلل عاشقا حلو الوصايف
لو تشوفينه تقولي كيف انا صابر معاك..!!
له عيونا موت واقع كنها حد الرهايف
والحلايا يشهد الله ضايعا معها حلاك
روحي يا بنت الاوادم وفري نزف الذرايف
الزمان اقفى ولالي قدره اتحمل خطاك
والضرير اللي تعود للضلام اليوم شايف
والخفوق اليوم عاد وفكه الله من بلاك
لا هموم ولا دموع ولا حنين ولا حسايف
كلها في طرد عاجل ودي ارسلها وراك
فايز الخشيف