زهدت في دنياي

زهدت من دنياي واقفيت عايف
ونا يابو تركي بزهرة شبابي
ما لي ورى الدنيا واهلها حسايف
اشوفها تزمي سوات السرابي
تكبر وتصغر كل ابوها خفايف
بس المهم إنا نقول الصوابي
على المعزه فوق روس النوايف
عسى الحقيقه شمسها ما تغابي
العلم مثل الطيب يبغى كلايف
يالي على اليمه تسوق الركابي
خذلك نصيحه من بنوك الطرايف
عن الصلاة الواجبه لا تغابي
وطلع زكاة المال قبل الصحايف
تطوى وقدامك ثواب وعقابي
يا رب انا طالبك يا خير رايف
حسن التعامل والعمل والثوابي
وانك تكافينا جميع الطوايف
المفتري والمرتشي والمرابي
والمال ياهل المال اليا صار زايف
راعيه قدامه سؤال وجوابي
في مواقف فيه القلوب الولايف
تنسى بعضها في نهار الحسابي
ونهاية الموضوع غزو ونكايف
أيامنا مرت مرور السحابي
الادمي لو يملك ازكا الوظايف
من التراب ومرجعه للترابي