قصة

للحلم نبرة حنين وللسهر قصّه
اجمل تفاصيلها بالصبح ننساها
البارحة راح من ليل الشقى نصّه
ابحث عن الذات في وجهه ولا ألقاها
يابنت الابطال يا اخت الحزن ياحصّه
اقدارنا ب انفس الايمان نرضاها
ودي ابوح بحروفي واشعر بغصّه
مايدرك اللي سلى خاطرْه فحواها
ليت السنين اوقفت في مبتدا الحصّه
ولا حفظت الدروس ومرّ مغزاها
من خاتم العمر طاح بغفلتي فصّه
وسوارتك شوهت الايام معناها
ياحلمنا اللي تسلل خلفنا لصّه
في ساعةٍ ماتزل القوس مرماها
مهما جيوش الندم بالصدر مرتصّه
باقي لنا فرصةٍ مابعْد اخذناها
ياليل ظلمك علي باللي تبي وصّه
وصّاة اخوها لها من يوم وصّاها
هذا الظلام الكئيب الحالك اش خصّه
يستفرس نفوس شروانا ويبلاها
مايدري ان الصبر لو طال يمتصّه
واما طوتنا يد الغاره طويناها
مادام باقي نفَس والخالق اختصّه
باسراره اللي سكن بالروح مبداها
ابختصر لك امل فيما يلي نصّه
شمعتك هذي.. بعدنا ماضويناها