صوت الصورة

خضره على المكشوف والعالم تشوف
بطيخ حبحب عنب منقى وموز
والشمس تحرقها على كل الظروف
هذي طريقه يارقابه ما تجوز
شوفو لهم حل ولا فيها كلوف
ناس تبيع ومسهاكثر المعوز
حمد عبدالله الوايلي - حوطة سدير
افرح إلى شفت السعودي معه جح
يبيع مثل اللي يكلم بجوال
الله يبارك في عملكم وتصبح
تاجر خضار وكاثره عندك أموال
سعود عبدالعزيز الهزاع - نعام
هذا الفعل يا ناس ما هو حضاري
وسط الشوارع سببوا إزعاج للناس
في موقفٍ ممنوع بايع وشاري
فيه الخطر فيه المشاكل وحسّاس
هذا ومثله شوّهوا اليوم داري
واللي على هالحال ما عنده إحساس
محمد عبدالعزيز الخنيفر
- اشيقر
يا محلا كسب المعيشه
لو صارت الشمس حرّاقه
ما أبغا المكيف ولا فيشه
والنفس للرزق تواقه
عبدالكريم عبدالرحمن السلوم
– القرائن
أقعد على حيلك وخل عنك الهموم
رزقك على الله دايمٍ والله كريم
البيع بالخضره يا خوي خيرٍ يدوم
يجي الفرج من خالقك والله يديم
إبراهيم البليهي - الشماسية
الشمس تحرق لكن السعي واجب
وكسب المعيشه بالشرف والفضيله
أخير من نظرة قريبٍ.. وصاحب
ولا جلوسي.. بين أهل الفشيله
سعود سمران الدوسري
ياللي تبيع الجح ما فيه منقود
طلب العمل والرزق كلٍ يريده
واللي يردي الجود لا بد ما يجود
الله يرزق كل مجهد يزيده
بشائر القحطاني
- الرياض
الجح والمنجا متوفر نشوفه
في كل شارع ناس واقفة تبيع
وهو موجود باسواق الفاكهة المعروفة
طول السنة الشتاء مع الربيع
عبدالله علي الحوشاني
- الرياض
يا بايع الحبب ترى اليوم غلطان
ما هو مكان البيع وسط الشوارع
دوّر مكانٍ واسعٍ وسط ميدان
تلقى الأماكن بالبلد والمواقع
أبعد عن الأخطار ودروب الأحزان
خلّك نظامي لا تصير المواجع
ريان محمد الخنيفر
- الرياض
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 4871070 ونرحب بما تلتقطه عدساكم من الصور الهادفة والطريفة.. ويا هلا
صورة العدد السابق